Plantun de Prouvènço

Pèr coumpara dos planto d'encò nostre

Astragalus depressus & Scleranthus annuus

Astragalus depressus

Fabaceae Leguminosae

Nom en français : Astragale nain.

Descripcioun :
Aquéu cese-fèr trachis dins li tepiero roucaiouso de mountagno. Souvènti-fes rebalo au sòu, mai de cop, d'ùni ramo remounton. Li flour soun blanco tacado de vióulet sus la carèno. Li fueio soun longo, emé d'estipulo larjo e blanquinouso, e caupon de 6 à 14 paréu de fuioun.

Usanço :
Avèn ges d'entresigne segur sus aquelo planto. Pamens fau saupre que d'ùni cese-fèr (gènre Astragalus e Oxytropis) soun empouisounant (dounon de proublèmo néuroulougi).

Port : Erbo
Taio : 5 à 15 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Astragalus
Famiho : Fabaceae
Famiho classico : Leguminosae

Ordre : Fabales

Coulour de la flour : Blanco
Petalo : irreguliero
Ø (o loungour) enflourejado : 3 à 6 cm
Flourido : Printèms - Estiéu

Sòu : Ca
Autour basso e auto : 400 à 2800 m
Aparado : Noun
Mai à juliet

Liò : Tepiero roucaiouso
Estànci : Mountagnard à Aupen
Couroulougi : Éurasiatico
Ref. sc. : Astragalus depressus L., 1756

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.